Aðalskipulag Þingeyjarsveitar
Mótun nýs aðalskipulags
Undanfarin misseri hefur verið unnið að mótun tillögu að aðalskipulagi fyrir Þingeyjarsveit, sem byggir á aðalskipulagi sveitarfélaganna tveggja sem sameinuðust vorið 2022. Tillagan er vel á veg komin og var kynnt á vinnslustigi í janúar 2024 í samræmi við ákvæði 30. gr. skipulagslaga, nr. 123/2010.
Við kynninguna bárust margar gagnlegar ábendingar sem hafðar verða til hliðsjónar við fullvinnslu tillögunnar. Allar umsagnir má sjá í skipulagsgátt: https://skipulagsgatt.is/issues/2023/881
Nú styttist í að fullmótuð tillaga verði auglýst og þá gefinn sex vikna frestur til að koma á framfæri skriflegum athugasemdum. Athugasemdir sem berast verða teknar fyrir í skipulagsnefnd og sveitarstjórn og tekin afstaða til þess hvort tilefni sé til breytinga á tillögunni. Endanleg útgáfa tillögunnar verður síðan samþykkt í sveitarstjórn og send Skipulagsstofnun til staðfestingar. Nýtt aðalskipulag tekur gildi við birtingu auglýsingar þar um í B-deild Stjórnartíðinda.
Tillögugögn
Sveitastjórn mun birta auglýsingar og tilkynningar í ýmsum miðlum þegar fullmótuð tillaga verður sett fram. Gögnin verða þá aðgengileg hér og í skipulagsgátt Skipulagsstofnunar.
Þitt álit skiptir máli
Sem íbúi sveitarfélagsins eða annars konar hagsmunaaðili, er mikilvægt að þú kynnir þér efnisatriði tillögunnar og kannir hvernig hún snertir þína hagsmuni og samfélagsins alls.
Um aðalskipulag
Í aðalskipulagi er sett fram heildarmynd af landnotkun í sveitarfélaginu öllu og stefna sem þar kemur fram varðar því hagsmuni allra íbúa, landeigenda og fyrirtækja sem þar eru. Aðalskipulag er mikilvægt stjórntæki fyrir þróun samfélagsins og aðkoma íbúa og annarra hagsmunaaðila stuðlar að því að niðurstaða sé fengin á lýðræðislegan og gagnsæjan hátt. Eftir að aðalskipulag hefur verið staðfest verða allar framkvæmdir að vera í samræmi við þá stefnu sem þar kemur fram.
Um framsetningu aðalskipulags gilda ákvæði skipulagslaga nr. 123/2010 og skipulagsreglugerðar nr. 90/2013.
Lög og reglur
Skipulagslög, sjá einkum 1. gr. (markmið) og greinar 28-36 (um aðalskipulag).
Skipulagsreglugerð, greinar 4.1 til 4.9
Lög um umhverfismat framkvæmda og áætlana. Lögin kveða m.a. á um efnistök í umhverfisskýrslu sem fylgja þarf aðalskipulaginu. Sjá einkum 14. gr.
Lög um náttúruvernd. sjá t.d. 32. gr. um vegaskrá, VI. kafla um náttúruminjaskrá, VII. kafla um friðlýsingar, 61. gr. um sérstaka vernd, og XII. kafla um skipulagsgerð, framkvæmdir o.fl.
Lög um verndun Mývatns og Laxár.
Lög um menningarminjar. Sjá einkum 16. gr.
Lög um veitingastaði, gististaði og skemmtanahald. Varðar einkum stefnu um gistingu í þéttbýli.
Sjá fleira sem varðar regluverk á vef Skipulagsstofnunar.
Ýmsar leiðbeiningar er að finna á vef Skipulagsstofnunar.